Santa Lùssia, ’n parsóna, ‘n Muniçìpio e fra i banchéti de Piàssa Bra, Verona. La Santa, có’’l só gastàldo e có’’l só àseno, la ‘ncóntrarà i butìni e la ghé dónarà dólzi e zugàtoli.

di admin
La sarà ‘na bèla zórnàda el 12 de dicembre 2019, quando, dàle quàtro e mèza – parlémo del dòpodisnàr, vèra – àle séte e mèza, la gran Santa, che i g’a cavà i òci, póaréta!, la sarà in Bra, có’l gastàldo e có‘l só àseno, par saludàr i butini e i só’ zénitori, ‘n visita…

E nó, savémo, po’, còsa la ghé pòrtarà San Lùssia ai butini bòni, durante la nòte, quando la passarà dàle case, fin che i dòrme,  lassàndoghe ‘ncóra  zugàtoli – al dì de ancó, più che moderni, naturalmente – mandorlàto, càlche narànsa…, i-è ròbe de ‘na vòlta –  e via…, che lóri i g’a órdenà có’ tanto de létarìne…, lassàde sùla tàola de la cusìna, có’ ‘n póco de fién e ‘na caròta par l’àsenèl. Questo, par récórdàr i tempi, che, prima che i costruisse el palàsso del Muniçipio, ‘n Bra, gh’éra la céséta de Santa ‘Gnése, ‘n dó’ se vénerava Santa Lùssia, e butìni e vèci i ‘ndàva a onoràrla… L’è ciàro che la présènsa de tanti butìni e zénitóri, néla piàssa, l’àbia atirà banchéti e véndidóri  de zugàtoli e de tante altre ròbe…, fazèndo cusì nàssar la nostra fèsta veronese dei trì zórni de banchéti, a partìr, dal trédese de dicembre, dedicàda, a Santa Lùssia… Banchéti, che i-è stàdi sempre ‘ntéréssanti e che, ‘na vòlta, i’éra sòlo da védar, parché bèssi nó ghe n’éra… ‘Dèsso l’è tùto cambià e se pól cómpràrse quél che se vól e, par questo, la tradissión de sti banchéti l’è più bèla e ‘ntéressante. La présènsa de Santa Lùssia, fra i banchéti e fra i butìini, l’è la nóva e ‘intéressante ‘nissiatìva de ‘na Santa Lùssia ‘n carne e òssi, có’ ‘n vél che ghé cuèrze, có’ tanta cura, i bùsi dei òci,… ‘Nissiatìva, che l’è stàda ‘nunssiàda ‘n Muniçipio da l’assesór Nicolò Zavarìze, che l’è intrà néla Sala Aràssi, ‘cómpagnàndo la grande Santa dei butìni… L’assesór Zavarise l’a dìto – dopo avèr detaiàdamente cóntà la storia délavita déla Santa Martire – che la présènsa de Santa Lùssia, ‘n parsòna, la vòl significàr la vólontà de dàrghe più tòno, ànca ‘n futuro, ai trì zórni de banchéti ‘n Bra , créando, cusìta, atènsión, prima de tùto, ai butìni, àla stòria e àle tradissióni de Verona, àla cultura è àla identità veronesi. Nèla Sàla Aràssi, i-éra presenti ànca  
‘l diretór zenèràl de Confersecenti, Alessandro Torluccio; ‘l vicesindaco, Luca Zanotto; l’assessora, Edi Maria Neri, e el consiliér cómunàl, Alberto Zelger.
Pierantonio Braggio  
 

Condividi ora!